A Comisión Europea deu onte o visto e prace ao proxecto Campus do Mar tras a presentación efectuada por unha representación da Universidade viguesa co reitor, Salustiano Mato, á fronte, quen explicou que “para unha institución como a nosa, inmersa nun proceso de internacionalización, o Campus do Mar é un proxecto fundamental» do que estamos moi orgullosos..

Foi o director do Campus do Mar, Emilio Fernández, que debulló polo miúdo os obxectivos, misión, eixes estratéxicos, organigrama e demais aspectos do proxecto. “A súa misión é converterse en dinamizador dunha rede transfronteiriza e integrada de unidades de investigación, docencia e transferencia de coñecemento, que forme aos mellores profesionais e investigadores no ámbito das Ciencias e Tecnoloxías do mar, que xere investigación de calidade e impacto internacional e que proporcione á industria as mellores ferramentas para mellorar a súa competitividade a escala global”, salientou.

Fernández explicou que agrupa a 3101 investigadores, 1359 doutores, 24 institucións, 10634 traballos de investigación, 582 teses de doutoramento, 6402 proxectos de investigación e 274 millóns de euros en contratos de I+D. “Non é un proxecto de infraestruturas senón de cerebros, de talento” destacou Fernández, que amosou a súa total confianza no éxito da singradura do Campus do Mar, asegurando que dentro dun par de anos regresarían de seguro a estar alí para falar non dun futuro prometedor senón dunha realidade de éxito.

Para reforzar institucionalmente a presentación acudiu o director xeral de I+D+i da Xunta, Ricardo Capilla, quen recalcou que o proxecto é estratéxico para Galicia e conta con apoio da Xunta ao ser o mar un tema no que hai moito que dicir.

Fonte: Diario da Universidade de Vigo 07/04/2011

A USC mantén aberta a convocatoria dos III Premios María Barbeito de Educación en Galicia, que convoca a través da Facultade de Ciencias da Educación en colaboración coa Consellaría de Educación. Os premios recoñecerán publicamente aquelas iniciativas, centros e investigacións psicopedagóxicas que polo seu valor e interese contribúan ao desenvolvemento educativo de Galicia, favorecendo así a innovación, a calidade educativa e a renovación pedagóxica.

O premio contempla dúas convocatorias, unha dedicada a salientar a Investigación Pedagóxica, cun único premio dotado con 1500 €, e o outra orientada á Innovación e á Experiencia Pedagóxica, con dous galardóns (un primeiro de 1000 € e un segundo premio de 500 €).

Os traballos presentados serán orixinais e inéditos, debendo estar redactado ou elaborados en lingua galega. Presentaranse por triplicado, en DIN A4, mecanografados a duplo espazo por unha soa cara, podendo acompañarse de toda a documentación complementaria escrita e gráfica que os concursantes consideren oportuna. As propostas non poderán ser dunha extensión inferior ás 150 páxinas no caso da modalidade de ‘Investigación Educativa’

A presentación dos orixinais realizarase no rexistro da Secretaría de Decanato da Facultade de Ciencias da Educación, estendéndose o período de recepción ata o 30 de xuño de 2011. Deberán ir debidamente identificados na solicitude de participación dirixida ao decano, facendo constar nome da entidade, institución, persoas responsables da autoría; enderezo profesional e teléfono; título do traballo presentado; e modalidade á que se concursa.

Xulgarán as propostas presentadas dous xurados específicos, formados en cada caso por cinco personalidades do ámbito educativo designadas conxuntamente pola Reitoría da USC e a propia Facultade de Ciencias da Educación, segundo se anunciará cunha antelación dun mes á data de concesión dos premios.

A data pública do ditame e o acto de libramento dos premios terá lugar por medio dun acto público que se celebrará en Compostela no mes de outubro de 2011.

Fonte: Xornal da USC 05/04/2011

O reitor da USC, Juan Casares Long, asinou este martes, día 29, convenios marco de colaboración con dúas das máis importantes universidades de Rusia, a Universidade Estatal Lomonósv (Moscú) e a Universidade Federal do Sur (Rostov-on-Donm), no transcurso do II Encontro de Reitores de Universidades Rusas e Iberoamericanas, que se celebrou este luns e martes en Moscú.
Estes acordos teñen como obxecto fomentar a investigación, a docencia e mobilidade de profesores e estudantes. A Universidade Estatal Lomonósv de Moscú é a máis importante e prestixiosa unversidade rusa e sitúase entre as trinta primeiras universidades do mundo.  No acto de sinatura do convenio entre o reitor desta Universidade e o da USC participaron tamén  o ministro de Educación de España, Ángel Gabilondo e a viceministra rusa de Educación.
Ao longo das dúas xornadas analizáronse as liñas fundamentais de cooperación, a homologación e o recoñecemento mutuo de títulos, dobres titulación e programas conxuntos. Así mesmo, abordáronse temas como a innovación e transferencia do coñecemento e a colaboración entre a empresa e a universidade, entre outros asuntos. Na sesión de clausura, celebrada este martes, presentáronse as conclusións de cada unha das sesión celebradas e asináronse acordos de colaboración bilateral entre universidades, similares aos asinados coa de Santiago de Compostela.

Fonte: Xornal da USC 30/03/2011